Arratisja, avokati: Fola me të më 5 shkurt, nuk ka përse të ikë pasi presim drejtësi në gjyqin e Gërdecit.
Banorët e pallatit të gjeneralit: Nuk e kemi parë që nga janari.
Largimit në rrethana ende të paqarta i Luan Hoxhës nga Shqipëria i shtohen nuancat e një arratisjeje të mundshme në kohën kur pritet që gjykata të shpallë vendimin për dosjen e tragjedisë së Gërdecit. Në një pallat luksoz përballë kryqëzimit te Drejtoria e Policisë së Tiranës ndodhet banesa e ish-shefit të Shtabit të Përgjithshëm të Forcave të Armatosura. Ndonëse duhej të ishte çdo ditë aty, banorët thonë se nuk e kanë parë Luan Hoxhën dhe familjen e tij prej të paktën dy muajsh. Një pohim ky që konfirmon informacionet e publikuara dje në gazetën “Panorama” për largimin nga vendi të ish-kreut të Ushtrisë shqiptare që më datë 1 janar 2012. Gazeta “Panorama” siguroi dy ditë më parë informacione, sipas të cilave ish-ushtaraku i lartë, që mban gradën gjeneral, ishte larguar në Shtetet e Bashkuara të Amerikës së bashku me familjen e tij. Ajo çka vuri në pikëpyetje arratisjen e mundshme, ishte fakti se udhëtimet e Luan Hoxhës jashtë Shqipërisë ishin kthyer në rutinë ,pasi ai lëvizte vazhdimisht. Mirëpo destinacionet e lëvizjeve të tij kishin qenë të afërta, në Kosovë dhe Maqedoni, ku ish-ushtaraku jepte mësim dhe jo në Amerikë, siç ka ndodhur në rastin e fundit.
Flasin rektori e avokati
Avokati i Luan Hoxhës, Ibrahim Lahi, theksoi se ka folur për herë të fundit me Luan Hoxhën më 5 shkurt 2012, në orën 20:44. “Vendimi i Gërdecit kërkon edhe një vit sa të shkojë në Apel, ne kemi besim te Drejtësia se do të japë një vendim të drejtë”, thotë avokati Ibrahim Lahi, që mbron Luan Hoxhën në Gjykatën e Tiranës. Ndërkohë, burimet nga universiteti privat në të cilin jepte mësim ish-zyrtari i lartë i Ushtrisë kanë thënë se që në fillim të janarit Luan Hoxha ka kërkuar të shkëpusë marrëdhëniet e punës. “Luan Hoxha i ka shkëputur marrëdhëniet e punës. Ka paraqitur një kërkesë ku thekson se do të shkëputet për arsye profesionale”, kanë thënë përfaqësuesit e universitetit privat ku jepte leksione Luan Hoxha. Sipas të dhënave, pas largimit nga Shqipëria, më 1 janar 2012, veç avokatit që e përfaqëson në gjykatë, Luan Hoxha nuk ka pasur komunikim me persona të tjerë.
Arratisja
Gjykata e Tiranës apo edhe Prokuroria pohojnë se nuk kishin vendosur ndonjë masë ndaluese për gjeneralin Luan Hoxhën në mënyrë që ai të mos dilte nga Shqipëria. Mësohet se Prokuroria nga ana e saj, në vitin 2008, pak muaj pas tragjedisë së Gërdecit, në mënyrë të përkohshme kishte bllokuar pasaportat e disa të pandehurve në mënyrë që ata të mos largoheshin. Pas aplikimit të përkohshëm të kësaj mase, Prokuroria vendosi heqjen e saj, duke qenë se katër të akuzuarit për vrasje mbaheshin në burg, ndërsa personat e tjerë të dyshuar për shpërdorim detyre u konsideruan se nuk paraqisnin rrezikshmëri. Burime zyrtare të Prokurorisë kanë thënë dje se largimi i Luan Hoxhës aktualisht nuk ka pasoja ligjore, për sa kohë nuk është konstatuar mungesa e tij në një moment procedural të procesit në gjykatë.
Deklarimi i ikjes
Sipas burimeve nga Prokuroria, për sa kohë që ndaj Luan Hoxhës nuk ka pasur ndonjë masë apo urdhër për të mos dalë nga Shqipëria, largimi i tij nuk ka pasoja. Burimet kanë shtuar se ligji njeh një procedurë gjyqësore kur çështja është në gjykatë, procedurë e cila quhet “deklarimi i ikjes’. Për këtë është e nevojshme që gjykata të kërkojë paraqitjen e të pandehurit dhe nëse ai nuk i përgjigjet kësaj thirrjeje, me kërkesë të palëve apo me iniciativën e saj, gjykata bën më pas edhe deklarimin e ikjes. Më pas, gjykimi vazhdon në mungesë të të akuzuarit me procedurat e zakonshme, ku me anë të një prokure i akuzuari përfaqësohet nga avokati i zgjedhur prej tij. Luan Hoxha ka paraqitur më 24 nëntor mbrojtjen e tij në Gjykatën e Tiranës, ku Prokuroria ka kërkuar 8 vjet burg. Pas këtij momenti, gjenerali është larguar nga Shqipëria.
TRAZHGIM SOKOLAJ
Prokuroria kërkoi dënimin me 8 vjet burg, gjenerali largohet nga Shqipëria para se gjykata të japë vendimin për Gërdecin.
Pritet vendimi nga gjykata për Gërdecin, nga 1 janari 2012 ish-kreu i FA nuk është paraqitur në punë.
Prokuroria kërkoi 8 vjet burg, ish-shefi i Shtabit në SHBA.
Gjenerali Luan Hoxha, ish-shef i Shtabit të Përgjithshëm të Ushtrisë Shqiptare, i pandehur në dosjen “Gërdeci”, është larguar nga Shqipëria prej më se një muaji. Ish-zyrtari i lartë i Forcave të Armatosura, mësohet se ka lënë Shqipërinë në datën 1 janar 2012, duke u larguar siç thuhet zyrtarisht, “së bashku me familjen në Shtetet e Bashkuara të Amerikës”. Nga burime jozyrtare mësohet se gjenerali Luan Hoxha nuk është paraqitur në punë në Tiranë që nga data 1 janar 2012. Ai jepte mësim si pedagog në disa institucione arsimore, me të cilat ka ndërprerë kontratat që nga fillimi i janarit. Në lidhje me largimin nga Shqipëria te gjeneralit të akuzuar në dosjen “Gërdeci”, zyrtarët e Prokurorisë së Tiranës konfirmuan mbrëmë vetëm faktin se Luan Hoxha, prej muajsh nuk paraqitet në gjyq. Sipas burimeve nga organi i akuzës, Prokuroria apo Gjykata nuk kishin vendosur ndaj Luan Hoxhës ndonjë masë ndalimi për të dalë jashtë Shqipërisë. Në këto kushte, sipas burimeve, ish-shefi i Shtabit të Përgjithshëm të Forcave të Armatosura nuk ka pasur ndonjë ndalim sa i përket lëvizjes jashtë shtetit. Nga ana tjetër, burimet nga Policia konfirmojnë daljen e Luan Hoxhës jashtë Shqipërisë, por theksojnë se lëvizjet e tij kanë qenë të shpeshta. Kështu, mësohet se për periudha disamujore Luan Hoxha ka qëndruar edhe në Kosovë, ku ka dhënë mësim në disa institucione arsimore private.
Largimi nga Shqipëria
Luan Hoxha është njëri nga të akuzuarit kryesorë të Prokurorisë në çështjen penale të tragjedisë së Gërdecit, pasi në pretencë ndaj tij është kërkuar dënimi me tetë vite burg dhe 5 vjet përjashtim nga funksionet publike. Pas këtij dënimi, përmes avokatit, Luan Hoxha ka kërkuar pafajësi dhe nuk është paraqitur më në gjyq. Po kështu, ai nuk është paraqitur as në punë që nga 1 janari 2012, duke u larguar në SHBA së bashku me familjen, siç thonë burimet, i pajisur me dokumentacionin përkatës të nevojshëm. Ky largim ndodh pak muaj pasi në shtator 2011, në kabllogramet e publikuara nga WikiLeaks, Luan Hoxha përmendej për një bisedë në të cilën ai kishte informuar ambasadorin amerikan Widhers në lidhje me Gërdecin. Sipas kabllogramit, Luan Hoxha i kishte thënë Widhersit se vendimmarrësi kryesor për Gërdecin ishte Fatmir Mediu, nga zgjedhja e Gërdecit si vend për shkatërrimin e municioneve deri te llojet e municioneve që do të shkatërroheshin dhe planifikimi i kohës se kur do të bëhej shkatërrimi. “Hoxha pranoi se stafit të tij i ishte thënë të transportonte municionin në atë vend dhe të ruante vendin. Hoxha tha se kur ai vizitoi Gërdecin, në mes të 2007-s, ushtarët e tij po bënin këto dy detyra, dhe në sipërfaqe u duk se nuk kishte asgjë të gabuar. Gjatë pjesës së dytë të projektit, nisur në dhjetor 2007, ishte urdhëruar nga Mediu, pavarësisht shqetësimit të tij drejtuar me një letër Kryeministrit Berisha, zonjës Topalli dhe Mediut. Pas kësaj, presioni mbërriti përmes telefonit nga një djalë i ri, i cili më pas u konfirmua si Shkëlzen Berisha, djali i Kryeministrit, që e urdhëroi të vijonte dërgimin e municionit të kalibrit të lartë në Gërdec, pa pasur asnjë vonesë”, shkruhet në kabllogramin e Ambasadës së SHBA-ve. Në dokument thuhet se “i pyetur nëse e kishte raportuar këtë informacion për Prokurorinë e Përgjithshme, Hoxha u përgjigj po, ai kishte dhënë të gjitha informatat dhe dokumentet për hetuesit, me përjashtim të informacionit lidhur me djalin e Berishës”. “Mbi këtë, ai tha se nuk ishte i sigurt që të fliste”, thuhet në kabllogram.
Pretenca në gjyq, Luan Hoxha kërkoi pafajësi për akuzat
“Ministria e Mbrojtjes anashkaloi Ushtrinë”
TIRANE – Në seancën e 25 nëntorit 2011, ish-shefi i Shtabit të Përgjithshëm, Luan Hoxha, paraqiti në gjykatë argumentet e tij mbrojtëse mbi akuzat e ngritura ndaj tij për shpërthimin e Gërdecit. Nëpërmjet avokatit të tij, i pandehuri Hoxha i kërkoi gjykatës deklarimin e tij të pafajshëm. Para gjykatës, avokati deklaroi se klienti i tij kishte kryer asnjë veprim që vinte në kundërshtim me përmbushjen e detyrës së tij të përcaktuar në ligj. “Klienti im, Luan Hoxha, në zbatimin e detyrave të tij si shef i Shtabit të Përgjithshëm ka qene korrekt dhe ka zbatuar me rigorozitet çdo detyrim ligjor të tij”, u shpreh avokati. Duke analizuar në detaje të gjitha detyrimet ligjore të të pandehurit Hoxha në funksionin e tij si ish-kreu i Shtabit të Përgjithshëm, avokati u shpreh se Prokuroria nuk kishte paraqitur asnjë provë që të vërtetonte akuzën që i adresonte gjeneralit, atë të “shpërdorimit të detyrës”. “Nuk ekziston asnjë element i shpërdorimit të detyrës së tij si shef i Shtabit të Përgjithshëm në hartimin e projekt-urdhrit 2044 apo gjatë zbatimi të tij”, pohoi avokati. Sipas avokatit, Gërdeci nuk u caktua si vend demontimi me urdhrin 2044, por që në fillim të projektit me urdhrin 550, urdhër i cili as nuk ka kaluar nëpërmjet shefit të Shtabit të Përgjithshëm dhe as nuk është marrë ndonjë mendim atij. “Në kohën e përpilimit të urdhrit 2044, në Gërdec kishte filluar puna që më parë, duke u demontuar municionet e kalibrit 7.5-31.5 m/m. Shefi i Shtabit nuk kishte asnjë detyrim ligjor, të përcaktuar në ligj apo ndonjë akt të veçantë, që të merrte përsipër e të ngarkohej me detyrimin për të kontrolluar licencimin e vendit të demontimit”, argumentoi mbrojtësi. Në diskutimin e saj përfundimtar, organi i akuzës kërkoi deklarimin fajtor të Luan Hoxhës dhe dënimin e tij me 8 vjet burg dhe 5 vjet ndalim për ushtrimin e detyrës.
Avokati: Ai udhëton shpesh në Kosovë
TIRANE – Përfaqësuesi ligjor i Luan Hoxhës, i cili mbron gjeneralin në procesin kundër tij në Gjykatën e Tiranës, u shpreh dje se nuk kishte dijeni për largimin nga vendi të klientit të tij. I kontaktuar në telefon nga gazeta, avokati pohoi vetëm lëvizjet e shpeshta të Hoxhës drejt Kosovës. “Nuk di që klienti im të jetë larguar jashtë territorit të vendit. Di që ai lëvizë shpeshherë drejt Kosovës, pasi jep mësim në një fakultet në Prishtinë”, u shpreh avokati. Në lidhje me ndonjë udhëtim të mundshëm të klientit të tij përtej Oqeanit Atlantik, avokati tha se nuk ishte në dijeni. Sipas avokatit, kontaktin e fundit me klientin e tij Luan Hoxha e kishte pasur tri-katër ditë më parë, kur ish-kreu i Shtabit e ka marrë në telefon. “Të jem i sinqertë, unë nuk kontrolloj çdo lëvizje të klientit tim. Në funksion të detyrës si mbrojtës i tij takohem me të një herë në dy javë. Herën e fundit kam folur në telefon. Më ka marrë nga numri i tij shqiptar”, u shpreh avokati.
No comments:
Post a Comment