Ekzekutim mafioz në Tiranë, vritet Arjan Selimi

Dashamir Biçaku / Lindita Çela

Një vrasje e stilit mafioz ka tmerruar mbrëmjen e djeshme kryeqytetin teksa viktima është një emër i njohur i botës së krimit, Arjan Selimi. I arrestuar me bujë shtatë vite më parë si pjesë e një grupi gjigant trafiku droge, momentalisht Selimi ishte në arrest shtëpie dhe çështja po rigjykohej. Ai ishte dënuar me 16 vite burg dhe duhet të ishte nën ruajtjen konstante të policisë. Por dje në orën 19.15 Selimi është vrarë nga një breshëri kallashnikovi teksa po hynte në makinë, vetëm pak metra larg shtëpisë ku bashkëjetonte me Inis Gjonin, vajzën e njohur të spektaklit. Vrasësit janë dy persona, të cilët janë larguar me makinë ose me motor, policia nuk ka mundur që ta saktësojë ende këtë detaj. Nga plumbat ka mbetur i plagosur rëndë edhe një djalë 19 vjeç, i cili mesnatën e djeshme ndodhej rëndë në Spitalin Ushtarak. Policia ka ngritur shumë pista hetimore, por më kryesorja është ajo që ka lidhje me të kaluarën e Selimit dhe trafiqet e drogës.

Vrasja ndodhi në rrugën “Skënder Shtylla”, pranë një kompleksi banimi ku Selimi jetonte prej pak kohësh në zonën e njohur me emrin ish-serat. Selimi mësohet se ka marrë së paku katër plagë me armë zjarri në trup, të cilat i kanë shkaktuar atij vdekjen e menjëhershme. Sipas burimeve, ai mori dy plagë në gjoks, një në qafë në dorë. Po ashtu ka mbetur i plagosur rëndë edhe Klevis Kola, një kalimtar, i cili ndodhej rastësisht rreth 10 metra larg vendit ku ndodhej Selimi.

Burimet thanë se dy personat që kryen ekzekutimin kanë derdhur në vendin e ngjarjes më tepër se 15 plumba nga arma e tyre automatike ndërsa mendohet se u larguan me shpejtësi nga vendi i ngjarjes. Një dëshmitar, i cili kishte parë Selimin vetëm pak momente pasi ishte qëlluar nga personat e panjohur, tha për “Shekullin” se menjëherë sapo personat u larguan ai u afrua dhe vuri re se personi i gjakosur në fytyrë dhe në trup, nuk jepte shenja jete.

“Menjëherë sapo e qëlluan ai u shemb në tokë. Personat ishin larguar me shpejtësi dhe nuk kuptova se nga e qëlluan apo nga u larguan. Menjëherë iu afrova dhe e pashë aty të larë në gjak. Nuk kishte asnjë shenjë jete nuk e preka, por vetëm u largova”,- tregon një djalë i ri rreth të 25- ve, ndërsa shton se personi i shtrirë në terren dhe i gjakosur, ishte me flokë të rënë, i veshur në mënyrë sportive, me një palë pantallona tre çerekshe me një palë atlete dhe një bluzë ngjyrë gri me jakë të lartë. “Ishte i gjakosur në trup fare pak, por në fytyrë ishte tërësisht i gjakosur dhe nuk kuptohej se nga e kishte marrë plagën”,- tregon dëshmitari që refuzon të identifikohet.

Burimet e policisë thonë se Selmi, është qëlluar nga një distancë e afërt 5- 6 metrash. Ekspertët në vendin e ngjarjes administruan një sasi prej rreth 15 gëzhojash të kalibrit 7.62 mm, që sipas ekspertëve mendohet se i përkasin një arme automatike “Kallashnikov”.

Ndërsa të shtënat i morën jetën në mënyrë të menjëhershme Selimit, vetëm pak metra më tej mbeti i plagosur Klevis Kola, një person 19 vjeçar, i cili sipas burimeve banonte në vendin e ngjarjes. Fillimisht dyshimet e policisë ishin se i plagosuri kishte qenë duke ecur me Selimin në momentin e plagosjes, por më pas u sqarua se ai ishte duke ecur pranë pallatit ku ndodhi ngjarja, me destinacion tjetër nga ai i Selimit. Në pak minuta në vendin e ngjarjes mbërritën një grup ekspertësh dhe specialistësh të policisë së komisariatit nr.2, të cilët më pas u munduan t’i jepnin ndihmën e parë Selimit, por ai kishte ndërruar jetë disa minuta përpara mbërritjes së policisë.

Mekanizmi i ngjarjes

Menjëherë pas kryerjes së veprimeve të para në vendin e ngjarjes, ekspertët dhe hetuesit e policisë kanë mundur të ngrenë mekanizmin e ngjarjes, falë këqyrjes së kryer dhe marrjes së dëshmive. Për këtë qëllim në drejtorinë e Policisë së Tiranës u shoqëruan më tepër se 13 persona, të cilët, sipas burimeve të policisë mund të ndihmonin hetimin me deklarime dhe dëshmi të vlefshme që mund të identifikonin autorët e dyshuar. Selimi në kohën që është qëlluar mësohet se ishte drejtuar në këmbë, duke ecur nga blloku i apartamenteve ku ai banonte në rrugën “Skënder Shtylla”, drejt rrugës “Stavri Themeli”. Pikërisht rreth 20 metra nga rruga “Stavri Themeli”, Selimi, u qëllua në pritë duke mbetur i vdekur në vend.

Viktima

Armand Andoni, i biri i Minella dhe Luçia, i datëlindjes 09/06/1974, lindur dhe banues në Tiranë, alias- (Arjan Selimi, i biri i Sokol dhe Florenca, i datëlindjes 09/06/1974, lindur dhe banues në Tiranë), akuzohet për kryerje të veprës penale të “Trafikimit të narkotikeve”, parashikuar nga neni 283/a, paragrafi i trete i K. Penal

Prokuroria

Deklarimin fajtor të të pandehurit Armand Andoni (Arjan Selimi) për veprën penale të “Organizimit, drejtimit dhe financimit të veprimtarisë me qëllim trafikimin e narkotikeve” të parashikuar si krim nga nenet 283/a, paragrafi i trete i Kodit Penal dhe dënimin e tij përfundimisht me 16 vjet burgim

Njohja me Inis Gjonin

Inis Gjoni dhe Arjan Selimi janë njohur në verën e vitit 2002 dhe pothuajse dy vjet më pas kanë nisur të bashkëjetojnë. Më pas Selimi bashkëjetonte me një vajzë që quhej Bela. Ai i ka thënë Gjonit se prindërit ndodheshin në Amerikë, ku kishte jetuar edhe ai më parë.

Emri i rremë

Gjatë verifikimit të gjurmëve të gishtërinjve të Arjan Selimit, prokuroria zbuloi se ishin të njëjta me ato të një personi të arrestuar në SHBA kohë më parë për shitje droge. Ai quhej Armando Andoni. Pas kësaj gjykata i ndryshoi emrin Arjan Selimit në Armando Andoni.

Trafiku i drogës

Nga përgjimi i bisedave dhe provat ka rezultuar se në datat 05-11 Maj 2001 të jetë transportuar nga Shqipëria në Itali nga korrier i panjohur sasia mbi 10 kg lëndë narkotike, heroinë me cilësi të dobët “e fryrë”, sasi e dërguar nga i pandehuri Armand Andoni (Arjan Selimi) dhe Artur Gjini, marrë në Milano nga Arben Myrtja 04.05.2001, që është tërhequr nga tregu narkoman me vështirësi. Me gjithë përgjimet e kryera në këtë periudhë, nuk është bërë e mundur të sekuestrohet lëndë narkotike.

Në datë 15-18.06.2001 është bërë e mundur të dërgohet një sasi lënde narkotike nëpërmjet shtetasit Arben Nikulaj nga te pandehurit Arjan Selimi (Andoni) dhe Artur Gjini. Në Itali do të pritej të shitej nga i pandehuri Avrami dhe Arben Myrtja, në Modena në Gallarate. Kjo sasi e lendes narkotike është gjetur dhe sekuestruar në kamionin tip’’Skania’me targa ****** e në brendësi të gomës rezerve janë gjetur 26 pako të mbështjella me shirit izolues futur në një tub gome, me peshe totale prej 16.750 kg. Të pandehurit e kanë trajtuar këtë rast në bisedat e tyre si “rastësi” dhe nuk besonin se ishin në ndjekje.

Në datat 01-05 korrik 2001 i pandehuri Arjan Selimi(Armand Andoni) dhe Artur Gjini kanë komunikuar për dërgimin në shtetin italian të një sasie lënde narkotike prej gati 10 kg heroinë me anë të drejtuesit të një automjeti ****** e që pritës të kësaj lënde narkotike ishin në Gallarate- Arben Myrtja, Adriatik Pemaj, Nikoll Filipi. Dhe në këtë rast nuk është sekuestruar lënda narkotike që mendohet se kanë dërguar i pandehuri Armand Andoni e Artur Gjini.

Dosja italiane e Arjan Selimit

Në vitin 2004 prokuroria ka dërguar për gjykim çështjen e Arjan Selimit së bashku me shtatë persona të tjerë të akuzuar si anëtarë të një rrjeti gjigant të trafikut të lëndëve narkotike në të gjithë Europën. Hetimet kanë nisur nga prokuroria italiane, e cila ka kryer edhe pjesën më të madhe të përgjimeve. Policia dhe prokuroria jonë janë mjaftuar me materialet e ardhura nga Italia dhe kanë kryer arrestimet.

Sipas prokurorisë, grupi dërgonte heroinë nga Shqipëria në Itali, nëpërmjet korrierëve ndërsa vetë, përmes telefonit, caktonin çmimin, pritjen e sasisë së lëndëve narkotike etj. “Të pandehurit merreshin me dërgesa në sasi të ndryshme sipas një linje e çmimi të paracaktuar, shitjen e lëndës narkotike me çmimin të vendosur nga vete ata, me qëllim përfimin material, një pjesë të të cilit ia jepnin bashkëpunëtorëve të tyre”,- thuhet në dosje. Paratë vinin nga Italia në Shqipëri përmes korrierëve të tjerë. Organizata nuk përdorte asnjë herë të njëjtët korrierë

Por ajo që bie në sy në organizatën e Arjan Selimit ishte cilësia e dobët e lëndës narkotike. Nga përgjimet e kryera nga prokuroria italiane ka rezultuar se klientët ankoheshin për cilësinë e mallit. Nga analizat ka rezultuar se bëhej fjalë për heroinë 12%-20% të pastër.

Biseda mes Artur Gjinit dhe Arjan Selimit më 09.05.2001

Gjini: “Pse e ke fikur telefonin?”.
Selimi: “Ndodhesha në një vend larg nga Tirana ku nuk ka linje”.
Gjini: “Nervozohet për djemtë që i kishte dërguar një ditë më parë, të cilët kane menduar se Turi i ka dhënë atë gjënë e vjetër (të mbetur).
Selimi: “Bëj si te duash, a kanë qenë prishur të gjitha?”
Gjini: “Po, janë prishur të gjitha dhe ka ndodhur më keq se herën tjetër”.
Selimi: “Gjithçka ka ndodhur nga të ngrohtit”.
Gjini: “Telefonoji atij mikut dhe thuaji që të ketë kujdes dhe të mos thotë asgjë për personin tjetër dhe të mos mendojë se është ajo gjëja e vjetër, por thuaji se është një tjetër e rë për të pasur mundësi ta nisin”. Selimi: “Dakort”

Për këtë bisedë avokati ngriti pretendimin se mund të jetë zëri i shtetasit Herti Dhales, por nga deklarimet e shtetasve rezultoi që ky numër telefoni është përdorur nga i pandehuri Armand Andoni (Arjan Selimi).

Nga biseda telefonike e përgjuar del në pah se Armand Andoni është dërguesi i lëndës narkotike dhe komentojnë se mos ka qenë ndonjë incident arrestimi i Arben Nikulatj. Gjithashtu rezulton se Arben Myrtja dispononte sasi të tjera droge në banesën e tij.

Selimi: “Kush je”.
Myrtja: “Jam ai shoku, me duket se nuk është asni gjë ajo puna, me duket se kanë bërë kot ata”.
Selimi: “Jo nuk ka asnjë mundësi”.
Myrtja: “A thua”.
Selimi: ”Jo, jo, vëllai i tij është një nga më të njohurit këtu në veri, është miku im, kupton? Vetëm atë nuk duhet ta mendosh”.
Myrtja: “S’kam lënë vend pa parë këtu”.
Selimi: “Mendoj se ka qenë një incident, ndonjë gjë e vogël e 12-24 orëve, e ke parasysh”.
Myrtja: “Shpresojmë!”.
Selimi: “Nëse jo, do të kishte bërë bum deri tani. Por ty duhet të më bësh një nder, duhet të rish larg nga këto gjëra të paktën sa për tani, se ti tregoj unë, a me kupton?
Myrtja: “Mbrëme kisha ca miq për darke, me kupton? Nuk dija se çfarë të bëja, me kupton?
Selimi: “Po, po”.
Myrtja: “Dhe kshu shkoji njiçik e gjatë”.


Një tjetër bisedë mes Armando Andonit (Arjan Selimit) dhe Artur Gjinit:

Armand Andoni: “Pse nervozohesh kaq shumë!”
Turi: “Nuk mund të gjejmë para nga të gjitha anët dhe nuk mund tu kërkoj para çdo ditë personave dhe se ti kë një llogari të hapur me atë të Tropojës”. Nuk i kam parë paret dhe se nuk mund tu marri paret njerëzve me forcë dhe ato janë fshehur”.
Armand Andoni: “Shih se do të të dërgoj, sa do ta japim atë që ka mbërritur dje?
Turi: “Nuk e di, nuk e di akoma se si është”
Armand Andoni: “Lëre fare se si është, por sa do ta japësh?”
Turi: “Hajde këtu që të flasim… kush është ai”
Armand Andoni: “Diskutimet do ti bëj unë këtu, do të vijë një person dhe do të marri një, nëse i pëlqen do të vijë më pas të marrë 10, o ku ta di unë…, duhet që të vijë nesër. Ti a i ke të gjithë”
Turi: “Mirë, po na shkatërron me këto telefona, me këto gjera”
Armand Andoni: “A je duke folur nga një telefon i mirë apo jo?”
Turi: “Në telefon jam këtu, jam grindur pothuajse me të gjithë, shumë prej tyre më kanë mbyllur telefonat dhe janë larguar. Më sill kë të duash dhe të marri sa të doje, por duhet që të sjelli paratë, pastaj të marri gjërat”

Gykata e Lartë

Më shtatë maj 2010 Gjykata e Lartë rrëzoi vendimin për dënimin e Arjan Selimit me 16 vjet burg dhe ktheu çështjen për rigjykim. Prova kryesore e prokurorisë për dënimin e Selimit ishin përgjimet telefonike, por Gjykata e Lartë i kundërshtoi ato. Sipas gjykatës, ekspertët kishin përcaktuar se kishte probabilitet të pakët që zëri i të përgjuarit të ishte ai i Arjan Selimit. Por kjo nuk ishte marrë parasysh nga shkalla e parë dhe Apeli, e për këtë arsye çështja u dërguar për rigjykim.

Video Selimi-Gjonit në kabllogramet amerikane

Në morinë e informacioneve që Ambasada Amerikane në Tiranë i dërgon Departamentit të Shtetit gjendet edhe një pjesë për rastin e Arjan Selimit (Armando Andonit) dhe videos nudo të Inis Gjonit. Ja si është trajtuar rasti nga ambasada e SHBA-së

Kabllogram i datës 2 qershor 2006 me titullin: Media dhe OJQ premtojnë hetimin

“Mediat shqiptare kanë raportuar gjerësisht keqtrajtimin e një të dyshuari për trafikim ndërkombëtar droge dhe të kërkuar nga SHBA. Më 19 maj 2006 Armando Andoni, i njohur ndryshe si Arjan Selimi dhe Brian Fister Burke, një i kërkuar nga Marshallët e SHBA u dërgua përpara një gjykatësi që ti merreshin gjurmët e gishtërinjve dhe të verifikohej identiteti. Mediat raportojnë se Andoni hoqi të gjitha rribat, përveç mbathjeve për të ndaluar këtë procedurë duke besuar se nuk do ta dërgonin përpara gjykatësit në atë gjendje. Kur e kuptoi se do të dërgohej në gjykatë edhe pse ishte pjesërisht nudo, ai tentoi të rezistonte me forcë. I gjakosur dhe me mbathje ai u dërgua përpara gjykatësit, por gjykatësi refuzoi të procedojë me gjurmët e gishtërinjve…

Përpara këtij rasti çështja Andoni u bë sensacion mediatik kur një video e tij dhe të dashurës Inis Gjoni (një personalitet gjysmë-i famshëm) qarkulloi gjerësisht. Video e marrë nga telefoni i Andonit tregonte çiftin lakuriq duke thithur një pluhur të bardhë (mendohet të jetë kokainë). Avokatët e Andonit pohuan se këto imazhe ishin të papërshtatshme për tu bërë publike dhe se rrjedhja e tyre ishte bërë qëllimisht nga hetuesit që ta turpëronin”.

Inis Gjoni është shtatzënë

Pak muaj më parë Inis Gjoni dhe Arjan Selimi kanë shpallur publikisht fejesën e tyre si dhe kanë treguar se presin të bëhen prindër. Inis Gjoni ishte shtatzënë dhe priste një vajzë. Vetë Inis Gjoni ka rrëfyer muaj më parë se në një darkë Arjani i ishte afruar dhe e kishte puthur. Në këtë moment ai i kishte lënë në gojë një unazë me diamant dhe i kishte propozuar për martesë. Tashmë Inis Gjoni duhet të jetë 5 muajshe shtatzënë.